Leikhúsgjöf Morgunblaðsins

Á seinni frumsýningardegi Killer Joe, sem var í gær, dreifði Morgunblaðið "Leikhúsgjöf" til áskrifenda sinna á forsíðu blaðsins.  Gjöfin er í formi 1000 króna inneignar á leikhúsmiða á fyrstu 5 sýningar haustsins á Killer Joe.  Gildir tilboðið fyrir tvo, þannig að um verulegan afslátt er að ræða ef 2 miðar eru keyptir.   Við kunnum samtarfsaðilum okkar bestu þakkir fyrir þátttökuna í leikhúsgjöfinni - Mogganum og Landsbankanum.

 Allir í leikhúsið!

Ekki missa af sýningu ársins:

 

"Besta leiksýningin í íslensku leikhúslífi í dag"

                                                         

                                                     BG - Viðskiptablaðið

Sýning Ársins?

 

"Killer Joe hefur án efa stimplað sig inn sem ein af bestu sýningum ársins 2007."

       IBD, Blaðið 

            KHH, Fréttablaðið

Killer Joe, Leikfélag Akureyrar og Magnús Geir Þórðarson

Eins og sést í kynningarbæklingi Leikfélags Akureyrar sem dreift var með Morgunblaðinu í dag hefur LA boðið Killer Joe í heimsókn norður yfir heiðar eftir áramót.  Það verður gaman að sækja Akureyringa heim, enda leikferðir Norður undantekningalaust miklar skemmtireisur. 

Leikhússtjóri þeirra norðanmanna, Magnús Geir Þórðarson var staddur á frumsýningu Killer Joe í Borgarleikhúsinu síðastliðið vor og hreifst ákaflega af sýningunni .  Leikhússtjórinn, sem ekki er þekktur fyrir að láta tækifæri ganga sér úr greipum var ekki að tvínóna við hlutina og var samkomulag um leikferð til Akureyrar handsalað í frumsýningarhófi Killer Joe strax um kvöldið. 

Killer Joe snýr aftur!

Ein umtalaðasta leiksýning síðasta leikárs, Killer Joe, verður tekin aftur til sýninga í Borgarleikhúsinu í byrjun september n.k.  Leikaraskipti verða í sýningunni, því Jörundur Ragnarsson sem nýlega útskrifaðist úr leiklistardeild Listaháskólans tekur við hlutverki Chris sem Þorvaldur Davíð Kristjánsson fór áður með. 

Það eru margar frumsýningar á döfunni hjá Jörundi á haustmánuðum, því hann leikur stór hlutverk í kvikmyndunum Astrópíu og Veðramótum sem frumsýndar verða á næstunni, ásamt því að leika hlutverk í gaman-sjónvarpsseríunni Næturvaktinni ásamt Jóni Gnarr og Pétri Jóhanni Sigfússyni. 

Átta tilnefningar

Killer Joe hlaut alls 8 tilnefningar til Grímunnar í júní síðastliðnum, þar á meðal fyrir “Bestu sýningu ársins”, “Leikstjóra ársins” og hlutu 4 af 5 leikurum í sýningunni tilnefningu sem “Besti leikari ársins” fyrir hlutverk sín.  Killer Joe er því leiksýning sem engin má missa af.  Fyrstu sýningar haustsins eru 6. september og 13. september n.k.  Miðasala er þegar hafin á vef Borgarleikhússins, en um takmarkaðan sýningarfjölda er að ræða.

NÆSTU SÝNINGAR Á KILLER JOE:                                    FIM.6.SEPT.og FIM.13.SEPT. N.K.

    Blaðið         Fréttablaðið

TRYGGIÐ YKKUR MIÐA STRAX HÉRNA: www.borgarleikhus.is / www.midi.is  EÐA Í MIÐASÖLU BORGARLEIKHÚSSINS Í SÍMA 568 8000

Þröstur landaði Grímu!

Grímuhátíðin var haldin í gær og okkur til mikillar ánægju hlaut Þröstur Leó Grímuna sem besti aukaleikari ársins 2007 - auðvitað! 

Fyrir ykkur sem ekki enn hafið séð Killer Joe þá verður sýningin tekin aftur upp næsta haust í Borgarleikhúsinu.  Sjáumst í haust.

Aðstandendur Killer Joe eru nú loksins farnir í sumarfrí.....

Killer Joe með átta tilnefningar til Grímunnar!

Nú hefur verið tilkynnt hvaða sýningar fá tilnefningu til Grímuverðlauna leiklistarsambandsins fyrir leikárið 2006-2007.  Killer Joe fær hvorki fleiri né færri en átta tilnefningar og skipar sér þar með í hóp þeirra sýninga sem fá flestar tilnefningar þetta leikárið.  Tilnefningarnar eru eftirfarandi:

Sýning ársins - Killer Joe

Leikstjóri ársins - Stefán Baldursson

Leikari ársins í aðalhlutverki - Björn Thors

Leikkona ársins í aðalhlutverki - Unnur Ösp Stefánsdóttir

Leikari ársins í aukahlutverki - Þröstur Leó Gunnarsson

Leikkona ársins í aukahlutverki - Maríanna Clara Lúthersdóttir

Búningar ársins - Filippía Elísdóttir

Tónlist/hljóðmynd ársins - Pétur Ben

 

Killer Joe í sumarfríi

Sýningar á Killer Joe hefjast aftur næstkomandi haust í Borgarleikhúsinu.  Fyrstu sýningar eru áætlaðar um mánaðarmót sept/okt.  Gleðilegt sumar!

Síðustu sýningar!

Já það er rétt - það eru einungis 4 sýningar eftir í vor - Killer Joe er á leiðinni í snemmbúið sumarfrí.  Unnur Ösp leikkona er ólétt og því verðum við að frysta Killer Joe í nokkra mánuði.  Sýningin verður þó tekin upp aftur næstkomandi haust af fullum krafti. 

Í tilefni af þessum tíðindum höfum við sett inn AUKASÝNINGU Á SKÍRDAG - 5.apríl n.k.   

Hafið strax samband við miðasöluna og pantið ykkur miða á Killer Joe www.borgarleikhus.is  / www.midi.is eða í miðasölu Borgó í síma 568-8000

Þorvaldur Davíð til USA

Þorvaldur Davíð Kristjánsson sem fer með eitt aðalhlutverka í Killer Joe, hefur hlotið inngöngu í hinn virta Julliard listaháskóla í New York.  Þorvaldur fór til New York í febrúar s.l. og sótti um inngöngu í nokkra leiklistarskóla þar í borg.  Eins og sagt var frá í fjölmiðlum nýlega var Þorvaldur svo kallaður aftur til Bandaríkjanna um miðjan mars í lokaúrtak inntökuprófa í Julliard og þurfti þess vegna að gera hlé á sýningum á Killer Joe í Borgarleikhúsinu. Hann er fyrsti Íslendingurinn til þess að hljóta inngöngu í leiklistardeild Julliard.  

Sýningum á Killer Joe lýkur í apríl, en verkið verður þó tekið aftur til sýninga næsta haust.  Það er því ljóst að um síðustu forvöð er að ræða að sjá Þorvald Davíð í Killer Joe, enda flýgur Þorvaldur til Bandaríkjanna á haustmánuðum. 

Næstu sýningar á Killer Joe eru í kvöld (fimmtudag), á morgunn (föstudagskvöldið 30.mars) og svo hefur verið sett inn aukasýning á skírdag – 5.apríl n.k.