"Heldur manni vakandi, og vel það...."

Rokklendingurinn Ólafur Páll Gunnarsson - útvarpsmaður Íslands mætti á sýningu á Killer Joe s.l. miðvikudagskvöld.  Í útsendingu á Popplandi daginn eftir spjallaði hann við Guðna Má Henningsson um sýninguna, söguþráðinn og persónur verksins.  Óli Palli sagði Guðna í löngu máli frá því á mjög einlægan hátt frá fordómum sínum í garð leikhússins og í raun hve lítinn áhuga hann hefði á leikhúsi, og Guðni Poppstýra tók hjartanlega undir og sagðist yfirleitt hundleiðast í leikhúsi. 

Guðni Már tengdi áhugaverða frásögn við útskýringu Óla Palla á söguþræði Killer Joe.  Sú saga gerðist í Ameríku líkt og verkið okkar og sprettur eflaust uppúr sama jarðvegi einangrunar, afskipta- og menningarleysis.  Þar spilaði örvæntingarfull móðir aðal rulluna og fórnarlamb sögunnar var ófleygur ungi hennar - 17 ára sonurinn sem enn bjó á heimilinu.  Kona þessi hafði miklar áhyggjur af plássleysi innan heimilisins, og leysti vandamálið á einfaldan og áhrifaríkan hátt - hún lét myrða son sinn.  Guðni hefur ekki enn séð sýninguna, en þessi saga er skemmtilega nálægt því úrræðaleysi sem þjakar persónur Killer Joe.  "Ég heyrði að þið voruð að tala um að kála mömmu... ...mér finnst það fín hugmynd"

Óli Palli er ekki maður sem kastar sér á milli veggja af hrifningu, það má segja að hann sé útvarpsmaður fárra orða - enda hafa tónlistarmennirnir yfirleitt orðið í Rokklandi.  Sá eiginleiki, í bland við einlægar umsagnir og beinskeitta gagnrýni útvarpsmannsins gefa honum vigt sem engin annar tónlistarspekúlant hefur á útvarpsbylgjunum í dag, og að mínu mati titilinn: Útvarpsmaður Íslands.

Á sinn hæverska hátt lýsti Óli Palli hrifningu sinni á sýningunni, og þá sérstaklega undrun sinni á því hversu hratt tíminn hafi liðið á meðan hann sat í myrkvuðu leikhúsinu.  Skyndilega var komið hlé, og áður en hann vissi var sýningin búinn - og hann kominn út á götu.  Eftir sat hressandi kvöldstund og óvænt skemmtun.

Hér greip Guðni Már inní og útskýrði mælikvarða sinn á leikhúsið.  Hann skipti leiksýningum í þrjá flokka, sýningar þar sem þú sofnar fyrir hlé, eftir hlé eða alls ekki - en þær síðastnefndu eru sjaldgæfari og vel þess virði að skella sér á - Óli Palli klingdi út með þeim orðum að Killer Joe haldi manni vakandi - og vel það!

 

NÆSTU SÝNINGAR Á KILLER JOE:                                    FIM.22.MARS og FÖS.23.MARS N.K.

    Blaðið         Fréttablaðið

TRYGGIÐ YKKUR MIÐA STRAX HÉRNA: www.borgarleikhus.is / www.midi.is  EÐA Í MIÐASÖLU BORGARLEIKHÚSSINS Í SÍMA 568 8000

Athugasemdir

[Guðríður Haraldsdóttir, 17.3.2007 kl. 22:37]

Í nýjustu Vikunni er lofsamlegur dómur um Killer Joe ... Hrund Þórsdóttir blaðamaður skellti sér á sýningu á dögunum!